生活琉璃，讓繽紛的生活凝著

很有人情味的書 -- 街坊老店

2008-10-19T23:10:00.003+08:00

今日行過書店，巡左個幾鐘，發現到一本書，封面簡簡單單的一張相，係一家大細係自己的舖頭影的，寫著"街坊老店"四個字。果間係一間雜貨舖，成家人開開心心的來張大合照。望上去，很warm，很有人情味，而且很有故事性。

於是翻書一看，全都係相片，有著唔同行業的舖頭。不過，果d 唔係你見開連鎖店，又或者係大集團的舖頭，而係一間間的自己舖，一些傳統的舖頭，例如樓梯整錶舖，雜貨舖，大排檔等等。係每一張相，店主以及店員都會來張大合照，有笑的，有cool的，有擺大隻型男post的，有同狗狗一齊影的。而係相旁有文字簡單介紹，令你對果行業有更多的認識。

除左認識之外，當你見到幾代人都係間舖度，你就會覺得，果度有幾代人的心血，同感受到如何養活幾代人的辛酸，一切都得來不易。不過，很可惜，這一切都漸成歷史了。係不少的公屋商場，自領滙接管後，加租趕戶，大事裝修，令到呢d 咁有人情味的老店都難以經營，換來的，就是冷冰冰的，一式一樣的大型連鎖店。係果度，你唔會見到街坊街俚，再聽唔到"陳師奶，買餸返呀?"之類的對白。究竟，為左進步，為左效率，係咪要泯滅一切的人情味，把舊的東西都一一捨棄？

有時間行開書局，不妨找來翻一翻，回味一番。
Book: http://www.hkbookcity.com/showbook2.php?serial_no=124182

破霧──共鳴基督徒詩班年度音樂會2008

2008-08-24T23:54:00.003+08:00

一個無心的安排，賺左個長假期，嘻嘻。不過，都係懶洋洋咁過左，有丁點可惜。
來到假期的最後一日，應舊同學"里奧"的邀請，出席左一個音樂會。他係呢晚的表演者之一，係詩班的男低音。呢個詩班只成立左五年，聽聞五年對於一個樂團來說係一個短的時間，不過，見過今晚的表演，可以知道他們係非常用功。

兩個小時的表演，係慈雲山的國際基督教優質音樂中學暨小學以勒音樂廳進行。我都係第一次來這裏。呢個廳，有別於一般禮堂，佢確確實實係俾音樂演奏用的，從牆身設計以至座位安排，都可以見到。音樂會分上下兩場，主要由共鳴基督徒詩班演出。係上半場的樂曲(Requiem: 共七個樂章)使用較多樂器，有風班，鐵琴，豎琴，長笛，雙簧管及定音鼓，令這個小時的聲樂十分豐富。小休後來到下半場，雖然只有簡單的一個三角鋼琴作伴奏，但更見詩班的功力。其中，有兩首樂曲(Peace on Earth, I will sing)更邀請台下各位一起唱，令到單向的表演頓成雙向的交流、共鳴。身處其中，感覺最為特別。另外，不少歡悅的樂曲，見到表演者放下歌譜，輕鬆帶笑的歌唱，那份的感染力，令人陶醉。

雖然我不是教徒，但亦樂於聽呢方便的音樂。感覺上，各樂曲旋律風格都係差不多，我不太懂分辨，但就是那份莫名其妙的平和，叫人反思。

鳳園打蝶

2008-07-27T14:45:00.004+08:00

好耐好耐未影相了，前幾日俾同事撩起，就周六去影相喎。雖然係大熱天時(34'c)，但我見係大埔鳳園咁近，佢又部相機俾我，所以就算係一朝早(7:30am@大埔) ，我都跑了出來。
上一次去鳳園，已經係05年年尾了，今次係入口有個保育中心，要收入場費$20，不過見佢開始有規劃咁管理，所以都應該俾的。同上次唔同，不是電子機，所以都花左點時間去適應。對住d 花花草草，我開始懷念我以前枝100mm macro 鏡了。
雖然我地九點前就到，但可能太熱了，那些蝴蝶已經好活躍，手動機更難補捉。未夠十一點，因為太熱了，我地就離開鳳園。太早起身的確有點辛苦，但見玩左好一陣，都未到中午時間，還有成個下午做其他野，都覺值得。

---

18km 初體驗

2008-06-30T01:18:00.003+08:00

公司裏面，愛跑步的人有幾個，其中"李老闆"就係其中一人。佢家住太和，一星期幾次係大埔跑來跑去，不時更跑去大美督，大圍。就連佢個讀緊小學的仔仔，同佢一齊跑渣打十公里，都係約一小時。佢見我間唔中都有係大埔跑下步(因為要消肚腩嘛...)，就叫左我幾次一齊去跑，於是係今個周日，就赴會跑左一躺。我平時都係咁以跑下五六公里，俾自己郁下，十公里，都係因為渣打先跑過兩次足本。點知，今次一跑，就係18km (係平時的三倍幾呀!!!!!)，好有挑戰呢....

約左六點，係吉之島對開河邊等，熱下身後，就跑了。起初都唔係好快，不過，咁的速度，差不多係8-9km/hr。雖然未至於可以一口氣跑一程，但總算不太辛苦咁去到轉折點 (~9.3km: 54 min)(沙田濾水廠後的往馬鞍山的橋)。至少自己仲有氣。好彩天係唔熱，落過雨有d 風，所以都唔係好辛苦。慢步作休息後，就跑番轉頭。果時天已經開始黑，係返到吐露港時，仲落大雨。不過出來跑，都預左濕了，反而仲跑得舒服左，完全解決了散熱的問題。
係回程呢段，我休息的次數多左，因為左膝又開始"冤"了。所謂休息，都唔係停係度，只不過係行，幾分鐘後，又再跑番。去到最後的800m，我跑唔到了，唔係因為膝的問題，亦唔係冇氣，而係個人太倦。果種唔係肌肉的倦，而係成個人冇晒血糖，好眼睏的倦，真係路邊等過馬路，都要扶住，長d 的句子，都唔可以一口氣講晒。完全可以用"虛"來形容，哈哈 : D 。真係第一次，係有呢種倦的感覺。

另外，係網到找到d 資料:
青年人一般每天消耗熱量: 2200-3000kcal (卡路里)
每多餘的3500kcal會令體重增加 1 lb
60kg 的人跑步(10km/hr)一小時消耗 600 kcal
麥當當巨無霸一個: 530 kcal
乾炒牛河一碟: 696 - 1200 kcal
九洲拉麵一碗: 583 kcal
士多啤梨百力滋一盒: 575 kcal

Reference:
香港醫聯網, she.com食物卡路里計算, myvnc.com

熱血男女青年團2008 @ 西貢西灣

2008-06-28T22:29:00.004+08:00

又係拖左成個禮拜先至寫番Blog，見出左相，又留埋係Facebook，就更少意欲去寫Blog了。因為係Album (Picasa果個)度，都加左Caption，交待左容易。或者，呢度應該講下心情卦。

講真，果日真係好好天，之前幾日，仲擔心緊會唔會落雨唔成團，又或者會好悶咁屈係房，冇得玩，點知，到頭來不負所望，仲曬到傻。夏天玩水，的確係最正。今次去的地方係西貢西灣，train毅行時都行過好幾次，就係冇留意到，原來係有房出租的(不過，d 床同被就......如果好要乾淨的話，都係自己係沙灘起營睏好了)。其實，兩日一夜，又去沙灘又玩潭，都唔會預左有好多機會一大班人分組一齊玩team game，所以，唔會似O'camp咁識到大一班人。

第一日，入到去都下午了，安頓後就係自由活動，當然要即刻落水啦。係西灣亭落車，烈日下落大半個鐘頭山，又點可以唔落水降温呢。一玩就玩到太陽落山，本來有BBQ晚餐的，但因又氣太熱，變左炒粉麵自助餐。之後來些團體遊戲，聯誼一下。

雖然下午係咁熱，但晚上又出奇地涼快，係沙灘到坐，都好舒服。我地各自活動，有人行夜山，有人就留係沙灘。個天就左太清了，北斗天蠍，一眼就認到出來。如果有帶星圖就好了.....除此之外，有人帶左禁品來，非常感謝，如果唔係，都冇玩得咁開心。

第二日只有一個節目，就係去四疊潭。距離西灣好近，唔駛半個鐘就到。不過，路就崎嶇點，有d 位要手腳並用先過到。但去到個潭，你就會覺得，呢d 都唔係咩辛苦，完會值得。可能係之前都keep 住落雨，所以水量好足。我帶左相機，冇諗住落水，所以都係得個睇字，未有機會浸下。有幾個團員，有男有女，甚至跳潭。果度都有成七米幾高架。係果度唔覺唔覺，玩左成個上晏，食埋個中午就走了。

想想下，真係好耐冇行過山，走個澗了。今年多雨水，到頭來唔知有幾多日係ok 了。

...

黑色暴雨後，好多山徑都爛左....

2008-06-16T00:00:00.006+08:00

六月頭果場黑雨，大嶼山同港島都受都豪雨影響，多處地方水浸，不過，可能好多人都冇留意，其實不少山徑，都受影響。係漁護署的網頁 (web)就列出左受山泥傾瀉影響的山徑，不得不讚，就係佢有埋地圖，點出位置同最近標距柱的號碼，十分方便。如果呢排要行山，就最好先望望了。如果，第時有埋即時山火報導，咁就好lu~~~

(source) 睇來都有唔少地方受影響...

(source) 最嚴動重當然係大嶼山...

===

離留記

2008-06-09T16:57:00.006+08:00

諗住五月就可以結束OT 生活，點知來到六月，還是撕不下。星期五，係依依不捨的情況下，和同事離開公司，抛下工作，趕上村巴往牛池灣。經同事"添"的介紹，看過了糊塗戲班(facebook)的"靚太作死"，中英劇團的"風流劍客"，都覺得好好睇，故事，以至演員的落力，都令我想一睇再睇。上次錯過了"非禽走獸"，令我今次再唔想錯過了。

講真，每次都未知齣劇講乜，聽到同事"添"話好睇，就跟住去。今次都係一樣。看海報，完全唔知係古裝劇(web)，睇完後，係糊塗戲班的facebook page 找到一些(album)。唔好以為，佢係一齣好悶的愛情古裝片，其實，當中有不少笑位，例如做左鬼的陸兄同主角廖文風的對答，以至陸兄的出現位置，都好精彩。除了各人的落力外，值得一讚的就係舞台設計，那些活動場景，非常恰當咁表現出唔同的場景，一流。

係笑聲中，的確有不少令人思考的地方。當中，我真係好喜歡呢對︰
人情物事有天意，緣去時，莫強留；
離合散聚早註定，緣到時，莫放手。

係六月，佢地會係文化中心(劇場)表現，如果大家得閒，真係要去睇下。

26---30/06/2008(星期四至星期一) 19:30
28---29/06/2008(星期六至星期日) 14:30
(城市電腦售票網)

加場:
1,3,4,5,6/07/2008 19:30
1,5,6/07/2008 14:30
(城市電腦售票網)

$260/$190

2008-05-22T00:23:00.005+08:00

DC.LCD 維修....$518

年頭去北海道滑雪，唔錫住部DC，不時拎出來影，整到後面LCD 出左事，起初以為入左水，因為得幾條線，點知返到香港過左一陣，佢就有個大圓印，差唔多成個一毫仔咁大。終於，前果幾日就拎去整，雖然係周六，但人唔太多，幾個客之後就到我。起初以為，只要拆開佢，整走d 水就冇事，點知姐仔一睇，話LCD 爆左，要成塊換，原價六佰幾蚊，因為香港行貨有折，為$518。嘩.....但我又可以點？於是留低部機，佢話五個工作天有得拎。去到今個周一，就有師父打電話來，話部機周二ok，可以安排送上門，於是今朝我就係公司等部機到。除左$518，再加埋多一年保養，俾多$250....不過，有得送上門，又真係幾方便。

...

2008-05-14T00:32:00.003+08:00

用病來換多日假期....

很期待的假期，有三日，而且仲唔需要返公司OT，諗起都超開心。本來都有d 活動，但最後都唔成事，於是，就本著在家休息的心態，點知....，這回真是休息了。不知道從那裏沾了病，周日就開始發，起初沒有為意，只是吃了點成藥就休息，點知來到周一，就越來越嚴重了。第一次，就是越睏越頭痛。於是就落街睇醫生，點知.....屋村三家診所都休息了，於是死死氣回家，本想捱過一晚，明天才去睇。但待多一會，就是太辛苦了，就只好上網找醫生，本以為會有甚麼假期應診醫生名冊，點知寫住的，卻是農曆新年。就係香港醫生網(web) 搜尋回來的三數個醫生逐一打電話去問，到最後才找到一間在舊墟的，於是就飛的去睇。果度冷冷清清的，又不在保險公司的網絡內，只收現金，算吧，這也不理了。探過熱，嘩，姑娘一見就色變，即刻戴上口罩，說我很高燒，39'c (reference)!!! 我乜未試過呢。這個醫生倒也細心，最後說了，食過藥仲唔退燒，就要打針了....。回家後不敢怠慢，食完藥就睏了。幸運地，首輪落藥，已見成效，至少，睏得舒服，不會經常醒。

原來，假期找私家醫生是很不容易的，政府門診，早就滿額了。所以，若不想999的話，趁現在就好找出你住那區有那些醫生，以及會否假期應診了。

.

2008-05-04T21:25:00.007+08:00

上唔到網的假期

作為IT人，係公司同係屋企，都係開住電腦，上住網。其他人都會好詫異，對咁耐電腦，唔悶架咩？對我而言，公司就做野，屋企就係私人活動，所以唔可以混為一談。而且，上住網，實在太方便了，有咩唔識，可以即刻搵，要咩資料，簡直手到拿來。所以，呢幾日上唔到網，就簡直係城市人流落荒島的感覺，咩都做唔到。

自從上年和記免費由10MB 升級至30MB，上唔到網的情況開始出現，有時，就算攞到IP，上網的速度簡直令人叫苦。就好似這個周五，試過d/l 10MB file，都要成個幾鐘，得個30kb/s。整多兩整，連IP 都攞唔到。投訴的熱線已經打到架輕就熟，1222 -> 11#44係技術支援部, 11#430係客戶服務部....。約得師父，等得佢上來，都半個星期，問題就唔見左。唉....

不過，上唔到網，反而多左時間留意其他野。今早就乘機執下屋，把媽子的過期罐頭，零食一次過掘出來，清理一番。(竟然俾我找到未開的過期蜜糖.......)。另外，就係家裏的小花，原來都在開花了。
(金魚花)

(家樂花)

.

2008-04-28T07:04:00.018+08:00

綠野先鋒 2008 @ 大欖/黃泥墩灌溉水塘

又一年了，上年公司一大班人玩過一次，覺得幾好玩又有意思，所以今年再接再勵，報名參加。今年比上年多左一組，有四隊十六人，不過不少面孔都轉了。今年的地點，同往年一樣，都係大欖郊野公園，只係植苗的地方不同，在另一個山頭。

綠野先鋒 (Site) 係香港地球之友舉辦的活動，每年在四月的時份進行，分不同的組別，於六小時肉步行十公里，以及種植指定數目的樹苗(公開組為每隊 50 株)

我地今年沒有用紙皮箱，改用環保購物袋，再加CD 組成的支架，去分隔樹苗。雖然今年沒有大肆粉飾，但就有"WireFrame 姐"妙筆一揮的應景公司Logo 一個，再加上域琪的精工燙製，就完成左我地今次個醒目運苗工具，真係辛苦晒~~~

除左指定數目的樹苗，大會亦很歡迎額外種植，雖然種得多唔會有獎，但我地都好樂意出多少少力，多種一點。而且，怕好似上年咁，帶多左上山，但到頭來，都係剛剛好。(今年我個組有成六十幾株上山，但最後落山數苗袋，就只有58個。

呢度就係今年的種植場，山頭都站滿了人。公開組係另一邊(唔係眼到呢個山頭)。再行多陣先到，呢邊好似仲斜d 咁。

個個都努力咁種。好彩今日陰天，如果唔係，曬住咁種，一定好辛苦。

我地手快但細心地一株株咁種。大會早已按距開了泥洞，我地就係加肥料，除去苗袋，放入扶正，補回混有肥料的泥土，填平壓實，澆水。之後就要靠你地自己啦，樹苗BB ，加油呀。

活動完左，又來到元朗，咁就當然要食下d 出名野啦~~~

2008-04-25T02:03:00.007+08:00

難得的悠閒

彷彿，每個晚上都已經係工作的晚上...
彷彿，習慣了七點後，可以安安靜靜咁寫code 的環境...
不過，過的還是匆匆的生活...
很難得，可以靜靜的坐著，慢慢地享受著呢份晚餐。雖然時間很短，但卻係好好的休息時間，不用多想工作的事，閒聊著，多好。

2008-04-22T01:28:00.005+08:00

捐血@cyberport

每年差唔多呢個時候，紅十字會會到cyberport 擺檔兩日，呼籲捐血。以前的我好怕，打針喎，仲要枝針咁粗添，不過，上一次(都前年了，說來真羞家...)，差不多係俾同事捉落去咁，於是就捐左第一次血。班同事就係咁，專捉未捐過血的人落去，不過今年好似無乜收穫，好多人都捐過了。記得上一次要落麻醉針，今年就試下唔落，唔好諗咁多了，快快手俾佢插一野就算。可能今次個哥哥仔手勢好，好快一野就入左，只係有少少的感覺(比較下，都係覺得係人中位清黑頭痛好多)。

排隊等去放血的時候，同森美爸爸傾下偈，佢話以前係中學，一打完波就去捐，捐完再去打波，而且同學間更鬥快放血，試過四分鐘的紀錄。於是我今日都試下"捉緊少少"，最後都要成七分鐘先出左450cc，至於森美爸爸就好快，五分幾鐘。噢......真係好難破佢紀錄喎。(聽聞，原來而家係某處，捐完血有Mrs.Fields cookie食架~~)

今次捐血，捐就唔耐，七分鐘，反而等開始，同等凝血就花左唔少時間。明明都壓實左個傷口，點知等左好耐，到夠鐘拎開棉花，傷口都仲慢慢谷個血泡仔出來，未止血，於是又等......到我一切都ok 時，就見到史廸仔小朋友出左點問題，好似唔夠血，唔舒服，所以咪等埋佢先走......當中最有趣的係，俾人叫左 "佢先生係果度等緊佢....."

而家捐完血，再無果度好靚的襟針送了，換來的只係電話繩同相架仔一個。對我，真係作用不大，同佢講話我唔要了，留俾第二個，佢就話出左數，唔會收番，叫我送俾第二個。(說實話，都幾難送得出。)點解唔送番以前果D 襟針呢？

2008-04-19T09:50:00.003+08:00

四月係我的工作月?

呢個四月，都唔知發生咩事，公司的忙，令到自己錯過左好多活動。都唔知係咪要怪自己曾經講過，"三十歲前，點都要俾自己忙過"。記得唔知邊到睇過，三十歲前，最好俾自己忙下，如果老是沉淪於安樂之中，對以後的日子，就唔好了(點唔好？唔記得左lu)。就係咁，add-hoc 的tasks 不時就跌一兩件落黎，搞亂下你，而一些定好了，甚至交左的野，又漲了scope，老咬住你尾，揮之不去。相信，再係咁，就算而家閒日OT，周六或日返工都未必會夠，就黎要出賣埋個剩番果日了。雖然，係臨收工前，完成了定下的task 都好振奮，但搭完巴士洩過度氣，行番屋企時又會諗，咁樣做，又為左d 乜呢.....?

今個禮拜，先去唔到周三的香港舞台劇頒獎禮，我印象中聽過06那個，仲睇過一d 片段，覺得幾好睇，因為佢唔係提名，上台，頒獎咁簡單，會有片及一些短劇睇。而且今年仲有添同事去攞埋入場券，六張咁多。本來已經叫齊人一齊去，但最後因為有約、病、加班(我囉)、少人唔去而得番添同事一個，真係唔好意思了。

去到周五，本來去睇戲劇 "非禽走獸" (by 糊塗戲班(web))，點知，又係走唔甩，更氣憤的是，同事們走左冇耐，我就做完。不過，算啦，都找左同事代我了，於是又留係公司，double-check 多次，做下其他野，咁又一晚。講開呢個劇，都係因為睇過上次呢個戲班演過的 "靚太作死" (blog)，覺得好好睇，所以就再捧場。陳文剛及魏綺珊的落力演出，令我留下深刻印象。

去到周六，又出事了。今次玩得仲大，唔再係公司野，而係個天。三號風球加黑雨......本來今日可以去行下山，散下d 悶氣。原本定左今次行遠d (>10hrs)，紅石門初試綑邊出黃竹角咀，上大嶺再行番去水壩，有番d 難度，不過係海邊，多點風浪都麻煩，點知，個天就索性來個三號風球加黑雨......唉...所以，又變左工作天。做完野，見有時間，就一個人睇埋"三國"先走。

2008-04-12T21:50:00.012+08:00

大灘郊遊徑

今個星期初，同事間決定了今個周六休息，唔上山，點知係周五，阿燕同學來電，提議行山，於是便開始call 人，最終加埋自己有四個。今次亦都係中學同學間的第一次行山。想起第一次行山，應該係小學時一大班同學跟校長去行鹿頸尤德亭。之後果次，就已經係大學畢業(02)的九月，同兩個 u-mates逆行麥徑第三段(熱到仲差d 中暑添)。

今次行條路，唔太難，由西貢海下沿大灘郊遊徑行去黃石碼頭，約 6.7 km，高低差只有一段約100m，行左兩個幾鐘。今日天色麻麻，落過雨，陰沉沉咁，不過好彩行果時冇落雨，加上少少風，都好舒服。一路行一路傾下偈，好快就行完(兩點鐘出番西貢市，仲食埋個晏先走)。

係海下個小巴站，附近個公厠都好乾淨，
仲有個清洗員阿婆叫你幾得沖水添。

海下灣海洋生物中心(web)
不過要團體預約先入得....

不知名果實...

中間路經一個細沙灘，

除左有好多水草外，
就見到呢個冇晒刺，
比網球大少少的海膽 (wiki)

超寫意的牛牛

係巴士站旁，
好多牛牛好悠閒的食草，
enjoy 緊family day.

2008-04-08T01:22:00.007+08:00

要多做運動

琴日落街跑完10km，今朝起身，竟然覺得個肚腩細左，不過，我都唔多信，應該係未食早餐者。但係，兩腿今日就酸酸軟軟的，兩組四頭肌就最嚴重，看來真係要特別強化下佢地。返到公司，李老闆見我咁有心去跑步，就話要約我一齊跑，由太和跑去香港文化博物館，吓!!我冇聽錯嘛，間野唔係係大圍架咩？佢笑笑口咁講，"係呀，來回都係三十多公里者...."嘩，我估我跑完就真係邊到都唔駛去了，於是我就笑笑口咁話投降.....

其實，我都係見冇山行，先至要自己郁下，落街跑步。Plan 左今個月上山兩次，其中有次希望可以由紅石門綑邊出咀，雖然路程較長，但都要睇天氣。如果天氣有少少雨，都要改地方了，至於改去咩地方，就真係揀左好耐，都揀唔落手，講真，行過毅行d 路，都唔會再行，太易太悶的，又唔想行，咁就真係所餘無幾了。

2008-04-06T23:15:00.006+08:00

一連三日的假期

話咁快，一連三日的公眾假期咁就過去。雖然，屋企唔駛係正清拜山，但呢三日，又唔可以周圍走，始終，公司野令到我都唔放心去玩盡三日。

第一日假期，當然俾自己休息啦，需要，都仲要零星咁答公司email，不過，點都唔會俾自放太多時間係公司度。放假喎，至少俾一日我丫。裝下Dexpot，找下wallpaper，咁就用左個上午。其實，就算係放假，我最遲都九點幾起身，習慣了，唔可以再睏耐d。下午，就當然睇戲啦。早前找來了套動畫，"次元艦隊"(wiki)，全26 集，於是我就一日煲晒，由下午睇到十二點幾。呢套動畫都幾ok ，講緊我地呢個年代的日本，海上自衞隊有隻神盾裝備的護衞艦係出航期間，竟返左去1942年6月4日，直值二次大戰的太平洋上...。期中，最令人緊張的，就係佢一隻船對40隻當時的美國戰機，雖然都好一面倒，但都好緊張。

三日假期都咁好天，但就冇去行山。來到第三日，係萬分掙扎之下，終於為左個小肚腩，走左落街跑步。十公里，心想就係呢個數字。跑得太短的話，就冇意思了。可要知道，運動要持續二十分鐘以上，先會開始帶氧運動，燃燒積聚的脂肪。出門口前，係Google Earth plan 過條路，熱過下身，就落街了。十公里，就跑一個小時四分鐘，都算唔錯。當中膝蓋有點酸，不過，跑過一段路後，就適應了。跑到海濱公園，竟然遇到李老闆，佢帶埋兩個仔仔，拎住相機，好一個family day 呢，傾左兩包，我就繼續跑了。原來，今日公海濱公園有event，甚麼迎奧運之類，不過都六點幾了，曲終人散。其實，海濱公園的確係一個好地方，地方大又有草地又向海，係呢度真係可以hea 一個下午，舒服一下。呢度，還有我不少的回憶呢。

2008-04-02T00:46:00.003+08:00

Agile Development ...... Day 1

今日，幾經辛苦同幾名同事，可以聚在一起，開個stand-up meeting (more)，為的就係推行 agile development (wiki)。其實都係一個好機會去見識下新的development 方法，現在用緊的......唔，真係有好多改進的空間。之前"艾石"同事係度的時候，的確帶給了我們很多新的視野，Agile、Extreme Programming(wiki)、Pair Programming (wiki)可惜當時氣候尚未適宜，所以變相似係我的個人修業。現在，"安臣"同事提出了，推動了，而新的管理人仕又抱歡迎開放的態度，簡直可以一展掌腳。不過，要改development 的方法，的確很漫長，唔可能一下子成事，加上我地還未太過熟悉，所以真係要"摸著石子過河"，發展出一套具有OB特色的 Agile development。(突然發覺自己的用詞好祖國....)

講番今日的stand-up meeting，左等右等，見未人齊又走去做自己野，離離合合幾次，四個人終開得成會。我第一次開，乜都唔知，好似平時開會咁帶定紙筆，點知stand-up meeting 係唔預我地作任何紀錄，然後又唔可以坐，於是係公司的一角(部門新攻佔的地方，比較亂)，對住塊我地唔知係邊度執番來，約呎幾x呎幾的白板仔前開會。話就話係agile development day 1 stand-up meeting，不過我覺得似 prepare-to-agile-development day 1 stand-up meeting 多d。Anyway，我地就係咁，share 意見，尋找方向，理清道路.......。明天，又要再開了。

2008-03-31T00:48:00.004+08:00

RSS & RSS Reader

呢幾日，終於又慢慢咁寫番Blog(希望今次不會是三分鐘熱度，寫寫下又停左啦)，而且，發覺自己實左太懶，好多朋友仔的blog都冇定時去瀏覽下，令到自己out 晒，所以就諗計，有咩辦法可以一個地方知道晒大家有冇update呢？於是，就諗起了RSS (http://en.wikipedia.org/wiki/RSS)，一個簡單的xml file，有晒個blog 的內容。然後用rss reader (我就用Google Reader http://www.google.com/reader)，佢會自動定時去拎果個xml file，發覺有update，就會show 出來，所以很方便，大家都可以試下用。

當你有左個Reader 後，就要去Subscribe d feeds，去到人地的blog，睇下有冇呢個icon，或者[Atom]呢條link，有就click 落去subscribe。好多時佢都係一條URL，例如我個blog

Blogger.com: http://orionbill.blogspot.com/feeds/posts/default
MS Live Spaces: http://orionbill.spaces.live.com/feed.rss

其實，RSS 已經好common，如果大家想多d 朋友仔睇到你的blog，就要setup RSS了。

MS Live Spaces:
你的分享空間 > 選項 > 分享空間設定 > 同步發佈這個分享空間
(不過，你先要把使用權限設定為 "所有網際網路使用者)

Blogger:
(好似default 就有)

Xanga:
冇acc ，唔知點開，但條 RSS link 就係咁的format
http://www.xanga.com/rss.aspx?user=

HK Yahoo blog:
冇acc...
http://hk.myblog.yahoo.com//rss

RSS Reader:
=========
Thunderbird: (http://moztw.org/thunderbird/)
仲可以check email，可以replace Outlook Express，我都用緊佢來check email。

IE 7
你睇緊人地d blog時，應該都見RSS 個icon係Toolbar度，click 佢就可以用IE 來做RSS reader。(Ctrl-Shift-J)就可以show 晒個list 出來。

Google Reader: (http://www.google.com/reader)
覺得Google d 野好好用，又有得同gmail integrate，好方便。

Bloglines: (http://www.bloglines.com/)
Web版的rss reader，以前都用開。

2008-03-30T22:56:00.006+08:00

Music & Lyrics

早前公司的史迪仔小朋友，send 左段youtube 片來，話首歌"Way Back Into Love"好好聽，我一頭霧水咁睇過了，唔....ok....旋律幾好呀，跟住就不以為然。之後就算係史迪仔小朋友度借埋VCD返來，都只係擱左一旁。直到琴晚返到屋企，見仲有一段時間先開飯，就清下碟。部戲叫"Music and Lyrics"，中文叫"冧歌有情人"，其實我有時都覺改中文名的人太過本地化了，有時會改到個名土土地，人家叫"Music and Lyrics"咪幾好，簡簡潔潔。104 分鐘，成個故仔平平穩穩，沒有悶場(當然你唔好expect 有節奏緊張的動作場面啦，人家係愛情片來的)，成個故仔，我就唔係度講lu，不過，睇完後，聽番首歌，就覺得好聽左好多，因為有左故事，有左經歷，就唔會覺得空泛。
其實，唔知大家有冇發覺，音樂係可以幫助人憶起感受。如果係某d 時候，你經常咁聽住一d歌，係過左好耐之後，當你再聽番，你就會回憶起當時聽呢d 歌的情境感受。那一份的連繫，是很神奇的。大家不妨試下，甚至把佢地記錄下來，成為自己回憶的目錄。

Music and Lyrics
http://musicandlyrics.warnerbros.com/

Way Back Into Love

Don't write me off

之前唱K 聽過古巨基隻 "歡樂今宵2 -- 情歌王"，於是返屋企睇番MTV ，幾好睇，變左而家日日都係公司聽住呢首歌。

2008-03-29T23:35:00.009+08:00

地球之友 --- 綠野先鋒 (簡介會)

今日好好天，最適合行山，不過唔齊腳，而且又要去上學堂，所以要休息一次。今日下午三點至五點，去到荃灣大會堂，幾位同事都已經到來。呢個學堂為乜，咪就係for 四月廿七日的植樹活動。呢個活動一年一次，由地球之友舉辦，我已經係第二年玩了。上一年係公司，找來十六個人，今年都係一樣十六個，但不少都係新面孔了。
講番呢個活動，佢係一個籌款活動，分唔同的組別，我地參加左公開組，四個人一隊。係當日，就要完成十公里路(水塘邊的水泥車路)，而係中途位，就要用自己設計的運樹苗公工具，每隊帶五十株樹苗上山(呢段路唔長，幾百米，但路爛又跣，辛苦d)，然後係指定地方種植。上年同今年都係大欖郊野公園的黃泥墩水塘附近的山地進行。
其實，自己行開山，見到d 地方俾山火燒過後，原本好茂密的綠林，變成光禿禿的，都好唔開心，點解每年都仲有咁多人咁唔小心，留下火種引致山火呢。今日係學堂，有些少香港植林的簡介，見到兩張相，一張係山火前的綠林，一張係山火後的灰黃地，真係好震憾。

綠野先鋒2008
http://www.foe.org.hk/treeplanting/big5/index.html
大家可以去望望，有興趣可以下年去玩下，真係個幾好的體驗(不過每人要籌到$700....)

簡介會/學堂，約三個小時，講左當日的流程，種樹的知識，以及由物理治療師介紹的熱身及鍛鍊方法。

係Powerpoint 度見到幾得意，就影左落來。

呢d 就係今日領到的物品。今年件T-shirt 進步左，好似係dry-fit 果類物料。再唔係綿質。

2008-03-29T00:58:00.011+08:00

四日都係OT.....唔通四月都要.....?

放完假，對住個日曆，三月快過，四月到來，手頭上的工作，零零碎碎的一大堆，大大件唔太知做乜就一件，迫不得已咁放工OT，四日了，工作到九點十先走。不過，雖然係巴士接巴士，但都是一個小時十五分鐘就回到家，已經算快了。真係唔知，咁的生活仲要過幾耐....

今日放工時，見到部 lift裏面多左張畫，幾得意，至少令到部 lift冇咁悶。講開呢d 智能 lift，有時真係死激死你，係出面按了樓層，佢就會話邊部 lift 來 serve 你，有時你明明隔離部 lift 開左門唔郁，唔知係度等乜，但serve 你果部就遲遲唔落黎，唉.....

自己工作的地方，俾自己屋企仲要對得耐(短則九個鐘，長則十二三個鐘)，所以點都要放d 野係度，裝飾下。呢兩件野都係北海道買返來的。熊仔夾夾係熊牧場買，對手有磁石，可以打開，或者合掌夾住d 紙。而且條尾有機關，拉一拉會成隻震，好過癮。

呢對雖然唔係當地名產，不過，第一眼見到佢地時，就好鍾意了。簡簡單單的木製品，很 cute 的一對雀仔。尤其係對眼，只是鑽個孔這麼簡單，但就帶住了傻氣。每天，就係俾佢地咁樣望住我做野了。

2008-03-27T01:05:00.001+08:00

OT 返到屋企的最愛

開始落黎都要OT 了，冇辦法，Deadline 已定，仲要係hard deadline，交唔到貨會被人sue，你話還敢掉以輕心咩。不過，我都講過，三十歲前，點都要自己忙極過才好，所以我對OT ，都逆來順受。返到屋企，都十一點了，最感動的，就係媽仲未睏，我只要係冰箱點過菜後，沖過涼就有野食。當然，都是簡簡單單的食物。係屋企，夜晚果餐我都唔大食，而且更會避開米飯，菜餃包子才是我的最愛。